Alumnonan di Mon Plaisir Basisschool tambe ta cla pa Shoco sa Spel

Mon Plaisir Basisschool ta preparando su alumnonan pa Aruba su prome Spelling Bee nacional, esta e competencia di deletreo, Shoco sa Spel, organisa pa Fundacion Bon Nochi Drumi bao auspicio di Ministerio di Enseñansa. Docente di klas 6, Murielle Brown ta splica cu e scol a scoge pa participa na e spelling bee despues di un combersacion cu e docente di e otro klas 6 y e cabesante. Como cu e scol ta ricibi diferente invitacion pa actividadnan cu ta rekeri preparacion adecua, manera Mente Inteligente y schoolsport, nan mester scoge tur aña ta cu kico nan por y ta bay participa cu nan muchanan.

Den e caso di Mon Plaisir Basisschool, den klas 5 y 6 ta ofrece lesnan di Papiamento, Ingles y Spaño y di biaha a involucra e maestronan aki pa cu nan participacion. Juffrouw Murielle a keda encarga cu e preparacion pa Hulandes y ta bezig ta train cu e hobennan. Nan ta hopi motiva; nan ta train riba nan mes nacas nan so, pero tambe ta reuni hunto na un cas y den pauze pa train, Juffrouw Murielle a comenta. Como parti di e training siman pasa nan a wak Akeelah and the Bee hunto. E pelicula ta e storia di un mucha muhe di 11 aña cu ta bon den spelling, e ta surpasa tur obstaculo, e ta logra participa na e spelling bee grandi nacional di Merca y ta resulta e ganado.

Jason Gomez, kende ta participa den e categoria Papiamento ta splica cu Juffrouw Desiree Corea ta train cun’e pa 15 minuut durante di les tambe, unda cu e juffrouw ta laga e muchanan den klas scoge e palabranan pa Jason spel den klas. El a bisa cu el a haya tipnan valioso for di e pelicula cu nan a wak, entre otro con pa hala rosea y pa ta tin control ora cu e ta dilanti di un publico grandi. Un otro participante ta Tiffany Bikker y e tambe a gosa di e pelicula. E ta splica cu e ta train hopi, den klas cu ful e klas y na cas tambe, unda cu e ta repasa e palabranan cu su juffrouw a dun’e.

Priscilla de Veer ta un di e alumnonan cu ta preparando tambe y e ta train cu “spellingsborden” cu su juffrouw a cumpra p’e, pero tambe ta traha duro hunto cusu reserve, Janira Yarzagaray. Di su banda, Janira ta splica cu e ta gusta lesa hopi y pues ta train tambe asina. El a agrega cu e storia di Akeelah ta inspir’e, sigur den e sentido cu un mucha por logra tur cos cu e kier. Angele Mac-Jannet di Fundacion Bon Nochi Drumi Dushi ta corda tur hende cu Shoco sa Spel, Aruba su spelling bee ta tuma luga riba diabierna 20 di november, 2015.

Pa involucra tur mucha, e organisadonan a agrega un proyecto di arte na e evento aki, unda cu tur mucha por participa. E tema pa e aña aki ta “Creacion di Palabra” y el a haya un acogida hopi entusiasma di parti di e muchanan. Mac-Jannet ta agrega cu e evento Shoco sa Spel lo ta uno espectacular y e plannan ta pa sigui cun’e como un evento anual.

TUMA CONTACTO CU NOS:
Please enter your full name
Please enter your email address
Please enter valid email
Please enter your MENSAHE
Submit
Si, mi kier ricibi noticia BNDD.