Tanto Cuenta Centro Deportivo St Cruz

EXITOSO WEEKEND DI ‘TANTO CUENTA’ DEN Centro Deportivo Betico Croes

Weekend di 12 y 13 dos sala completamente yen di mucha, hoben y adulto a disfruta di e ultimo presentacion di e prome serie di Tanto Cuenta den bario. Tanto Cuenta ta un proyecto di FBNDD cu a inicia aña pasa, cu e meta pa promove lesamento na un forma diferente. Tanto Cuenta kier rebiba interes den cuenta di hada clasico. E ta encera un combinacion di contamento y teatro. Santa Cruz ta e di 4 bario cu Tanto Cuenta a bishita.

FBNDD ta sumamente contento cu e acogida den e prome 4 barionan. E salanan yen ta muestra cu interes pa storia y lesamento ta lantando bek, nos ta riba bon caminda. Tabata bisto cu e sala tabata biba cu loke ta pasa riba escenario of ora e actor y actrisnan tabata hiba nan presentacion den sala.

E stand di bende buki tambe a wordo bon bishita, hopi mayor a cumpra buki pa nan yiu. Mas interesante ainda, hopi mucha tabata pidi nan mayor pa cumpra buki pa nan. Esaki sigur ta un desaroyo hopi positivo pa loke ta e meta di FBNDD. Nos no ta cla ainda.

Comision Tanto Cuenta ta preparando caba pa e prome presentacion di e siguiente serie di Tanto Cuenta cu cuentanan di hada diferente. FBNDD ta habri e di dos serie na grandi den Cas di Cultura riba diasabra 14 di mei. For di april caba nos lo cuminsa cu promocion. Despues di Cas di Cultura Tanto Cuenta lo sigui bishita e barionan cu falta. Lo anuncia e fecha y barionan den prensa.

Niun logro no ta bin di mes ni ta para su so. E exito di Tanto Cuenta ta na prome luga danki na e tremendo ekipo di boluntario di FBNDD cu a hinca curason den e proyecto. Nos kier gradici tambe directiva di ASU pa uzo di e sala di Centro Deportivo Betico Croes. E sponsornan, Tec Inc, Ling & Sons IGA, Romar Trading y Panaderia Moderna pa nan donacionnan y sr. Aldrick Croes pa e parti di zonido.

TUMA CONTACTO CU NOS:
Please enter your full name
Please enter your email address
Please enter valid email
Please enter your MENSAHE
Submit
Si, mi kier ricibi noticia BNDD.