Shoco Sa Spel

Shoco Sa Spel Exitoso prome spelling bee nacional

Diabierna 20 di November, por cierto dia internacional di mucha, 71 mucha di klas 6 di scol basico a competi den e 4 idiomanan mas uza riba nos isla, segun e idioma di nan preferencia. Den sala di Renaissance Convention Centre completamente yen, alumno, mayor, maestro y interesado por a biba e momentonan di tension di e participantenan.

Fundacion Bon Nochi Drum Dushi ta felicita e 10 scolnan cu a acepta e reto pa participa na Shoco Sa Spel, e prome competencia di deletreo nacional. Nos ta sigur cu nan participacion lo motiva otro scol pa tambe participa den futuro. FBNDD ta acerca promocion di lesamento di un manera varia y diversifica, pa keda hala atencion di comunidad riba e importancia di lesamento. Enfoke principal di nos como fundacion, ta e placer cu lesamento ta duna e mucha, den cua forma cu esaki tuma luga. Deletreo di palabra por aporta na placer di lesamento.

FBNDD a scohe pa duna e competencia un toke local, cuminsando pa e nomber Shoco Sa Spel. A añadi un proyecto creativo na e competencia; scol, klas, grupo of alumno individual por a competi cu un obra di formacion di letter, palabra of texto traha di material recicla. Diferente scol a entrega obra masha creativo mes, cu a haci trabou di e hurado pa e parti aki bastante dificil.
A habri e atardi cu e storia Roboto cu a pone e sala lora abou di harimento pa e hilaridadnan cu ta tuma luga ora e mundo tecnologico di awendia topa cu e mundo den cua tecnologia ta desconoci ainda. E hoben Denzel Brown a rap na smaak riba Shoco si Shoco sa y a percura pa poco mas ambiente.

E nivel di e participantenan tabata halto, loke a haci cu pa e ultimo dos idiomanan a yega te ronde 11, prome cu por a saca e ganadonan. E hurado tabata bastante stricto, pero esaki no a stroba e participantenan, cu pa gran mayoria tabata hopi sigur di nan mes. Nos ta felicita e ganadornan; Papiamento, Kinchunson Ho di Colegio San Hose cu a gana cu e palabra peluca,Spaño, Marvin Rodriguez St. Anna School cu a gana cu e palabra guapo, Ingles, Ragnieska Blanco di Colegio Oro Ubao cu e palabra manner y Hulandes, Nathaly Arends tambe di Colegio Oro Ubao cu e palabra kapitein. E tres scolnan ganado di e proyecto creativo ta; Pieter Boerschool cu letter di alfabet traha di carton y papel di revista recicla, St. Anna School cu e nomber di scol traha di renchi di bleki di refresco y foam recicla riba palo. Y Colegio Frêre Bonifacio cu un cortina traha di tapa di plastic cu letter y palabra.

Nos ta gradici minister Hooyboer Winklaar pa e confiansa cu el a deposita den FBNDD cu epeticion pa nos organisa e prome competencia di deletreo n acional, conoci como spelling bee.Nos ta gradici tambe drs. Alida Kock, cu a skirbi y a coordina e proyecto, un tarea bastante grandi, mirando e enfoke nacional y e 4 idiomanan cu por a scoge. E docentenan encarga cu e listanan di palabra pa e diferente idiomanan a haci un tremendo trabou, tambe e hurado y e tecnico Jeffrey Ruiz. Nos MC, James van der Linde cu su carisma a haci un presentacion inigualabel y a percura pacalma e nervionan di e participantenan. Martica Franken y Merrilyn Lugay cu hunto a deleita e publico cu e storia Roboto, e hoben Denzel Brown pa a trece ambiente cu su presentacion dinamico di e rap Shoco si Shoco Sa. Coordinado di FBNDD, Angelle Mac Jannet y boluntarionan di FBNDD pa nan aporte na e exito di Shoco Sa Spel. Tambe nos ta sumamente gradicido na Superfood, Marietjes Printing, Renaissance Convention Center y Ministerio/Departamento di Enseñansa pa nan aporte na Shoco Sa Spel.

Un saludo cordial
Saludo

Olga Buckley
Presidente
FBNDD

TUMA CONTACTO CU NOS:
Please enter your full name
Please enter your email address
Please enter valid email
Please enter your MENSAHE
Submit
Si, mi kier ricibi noticia BNDD.