Feria di cuenta di pasco

Tremendo clausura di ana di actividad di FBNDD

Fundacion Bon Nochi Drumi Dushi a clausura aña di actividad 2014, cu un tremendo Feria di Storia. Un multitud enorme y varia, tanto di mucha como adulto a disfruta inmensamente di storia, poppenkast, declamacion, dramatisacion y musica, tur rond di e tema Pasco. E ambiente riba Plechi Bon Nochi Drumi Dushi tabata hopi dushi mes. E muchanan di
Anglo Kleuterschool, bou di guia di Poppy Caciaco, a habri e atardi cu un bunita baile riba e jingle di FBNDD, Swushi Mushi. E contadonan, Diana Marchena, Caluda Poulina, Alida Kock, Junior Tromp, Richard
Dabian, Dientje Croes, Madeleine Maduro y Merilyn Lugay, fuera di deleita e muchanan cu storia, a dorna nan tentnan masha bunita mes y crea asina e ambiente prerfecto di pasco. Bertha Wolff y su grupo Streanan di Paz a presenta e bunita nificacion di Pasco den e comedia, E strea bunita skirbi pa Bertha Wolff, cu a tene e publico den su gara te final. E hoben, Chantal Morell a declama e poesía Pasco, un composición propio, cu hopi sintimento. Mayornan a haci bon uzo di e oportunidad pa saca potret cu e diferente figuranan di cuenta di pasco. Manera custumber a clausura e atardi cu música; e grupo Streanan di Paz, bou di dirección di Sra. Bertha Wolff a pone lana di publico reis cu e bunita canticanan Clausura di e aña di actividad ta e momento tambe pa directiva reflexiona riba e meta di e fundacion y vision pa logra esaki. Ta conoci cu Bon Nochi Drumi Dushi ta un proyecto di promocion di lesamento cu enfoke riba e placer cu lesamento ta duna, banda di tur otro beneficio conoci. Es mas, directiva ta mira placer di lesamento como e herment principal pa por yega na e otro beneficionan, manera ampliacion di vocabulario, stimulacion di imaginacion, oido y concentracion, pa menciona algun. 2014 tabata un aña exitoso. Por bisa cu sigur a logra tene cuenta cu e importancia di creatividad, constancia y diversifcacion pa loke ta contenido y ehecucion di e diferente actividadnan. Directiva ta consciente cu lo no tabata posibel pa logra esaki sin e sosten di e boluntarionan, cu BNDD ta considera e curason di e proyecto. FBNDD ta bendiciona cu un grupo grandi di boluntario dedica, cu ta haci tur esfuerzo pa comparti e placer di lesamento cu comunidad di Aruba. Un bes mas FBNDD por a conta cu e apoyo di un cantidad di sponsor cu ta mira e importancia di e trabou cu e fundacion ta haci pa comunidad di Aruba.

Fuera di e balor di boluntario y sponsor, FBNDD ta reconoce e balor grandi di prensa pa por logra su meta y ta gradici prensa tambe pa su aporte y sosten.


Atentamente.

Olga Buckley.
Presidente FBNDD
Aruba, 17-12-2014

TUMA CONTACTO CU NOS:
Please enter your full name
Please enter your email address
Please enter valid email
Please enter your MENSAHE
Submit
Si, mi kier ricibi noticia BNDD.