CONOCE NOS

Historia

Bon Nochi Drumi Dushi ta un iniciativa di Olga Buckley, como parti di e tesina cu el a skirbi como finalisacion di e curso di Papiamento di Di Tres Grado, na aña 2007, organisa pa Insituto Pedagogico Arubano. Contrario na loke ta usual, no a desaroya e proyecto pa e tesina, pero a skirbi e tesina como sosten pa e proyecto.

A tuma algun tempo prome cu a pone tur piedra hunto, pero nos por bisa cu Bon Nochi Drumi Dushi ta un proyecto solido cu un fundeshi fuerte. Na 2007, hunto cu Rubia Bernabela, Olga Buckley a sondea prome na algun cas, tanto pariba como pabou di brug, con lo ricibi e idea di bishita cas pa lesa y conta storia.  E reaccion tabata masha hopi positivo mes.

Fundacion

Na 2009 BNDD ta evoluciona di un proyecto cu ta traha for di un grupo di trabou pa un proyecto formalisa den un fundacion. Fundacion Bon Nochi Drumi Dushi ta haya un base huridico. Fundacion Bon Nochi Drumi ta consisti di tres pilar:

Directiva:
Presidente: Olga Buckley
Vice Presidente: Rubia Bernabela
Secretaria: Swinda Arendsz
Tesorero: Jasmin Lacle
Comisarionan: Shirley van der Biezen, Martica Franken
Colaborado di oficina: Angele Mac Jannet

Boluntarionan
Un proyecto di e indole di Bon Nochi drumi Dushi no por existi sin e sosten di su boluntarionan. E boluntario ta e curason di e proyecto. BNDD ta conta cu un grupo di boluntario dedica y hopi motiva. Den transcurso di e 7 añanan di e proyecto mas di 200 boluntario a participa na un of otro actividad.

Punto di Salida

Punto di salida di e fundacion ta basa riba e teoria di promocion di lesamento diseña pa Aidan Chambers. Den su Circulo di lesamento Chambers ta indica cu lesamento ta un proceso circular den cua e adulto tin un rol prominente.

E adulto ta e intermediario cu ta guia e proceso di lesa. Banda di esey aspectonan manera, accesibilidad, disponibilidad, presentacion y apariencia atractivo di buki ta crucial den e proceso di lesamento.

 

Cultura di Lesamento na Aruba

Na Aruba nos no ta experiencia ainda un cultura di lesamento fuerte, esaki debi na diferente factor.  Primeramente, e idioma di instruccion ta Hulandes* na mayoria di scol. Esaki ta trece cu ne cu hopi biaha nos muchanan no ta compronde e idioma y ta perde elementonan escencial di e storia manera e  moral di e storia of identificacion cu e personahenan.

Nos tin cu bisa si cu ultimamente e crecemento global di promocion di lesamento ta contribui positivamente na e clima di lesamento na Aruba. Un otro desaroyo positivo ta introduccion di Papiamento como idioma di instruccion den enseñansa special y e scolnan piloto multilingual.

Diseņo di e proyecto

A diseña e proyecto den dos fase di realisacion; 

  1. Un fase di termino cortico; bishita na cas, e actividad principal (curason) di e proyecto, programa di television y DVD di e programanan di televisio.
  2. Un fase di termino largo; cu ta consisti di un lista largo di actividad, cu cual a logra cumpli manera describi.

Meta
Bon nochi, drumi dushi, tin como meta promove lesamento na cas, cu e enfoke riba e placer cu lesamento ta duna. A scoge e momento prome cu e mucha bay drumi pa diferente motibo. Na prome luga e momento di bay drumi ta e momento cu e mucha ta tuma despedida di e dia yen di actividad y hopi biaha yen di agitacion y stress. Banda di esey, hopi biaha mayornan no tin suficiente tempo pa lesa pa nan yiunan, apesar cu lesa pa un mucha 15 minuut prome cu e bay drumi ta stimula un contacto intimo entre e mayor y su yiu.

Hopi mucha awendia tin computer y wega electronico den nan camber y ta hunga  wega of wak pelicula cu hopi violencia prome cu nan pega soño, cu consecuencia cu nan mente no ta logra sosega. E muchanan aki despues di tempo ta perde concentracion y hopi biaha ta mas druk cu normalmente durante dia y na scol. E programanan di conta storia na television y e DVDnan ta un intento pa haci uzo positivo di e medionan tecnologico existente.

Lesamento y/of contamento di storia ta stimula e mucha su imaginacion, su idioma y su oido. A lo largo e por stimula interes den lesamento cerca e mucha. E lesamento  na cas lo tuma luga den un periodo di tempo defini di antemano. E intencion ta pa e mayor mes despues di tempo tuma e lesamento prome cu drumi over. Despues di tempo lo mester lanta cerca e mucha mes e interes den lesamento, como un actividad agradabel y no obligatorio. E proyecto aki por trece tambe structura den fihamento di e orario di drumi di e mucha.

Grupo meta

E prome fase di e proyecto ta enfoca riba e mucha di 4-8 aña, pasobra esaki ta e edad mas apropia pa lanta interes den lesamento cerca e mucha. Esaki no ta kita cu for di den bariga di e mama caba por cuminsa stimula lesamento cerca e foetus. Ta importante pa stimula e mucha di e edad di 4-8 aña pa lesa, pa e proyecto por tin resultado. Si tin mucha di diferente edad, tur mag di participa. Ta stimula mayornan pa tambe ta presente den e espacio unda ta conta storia, pero e mucha den e edad di 4-8 aña ta keda central.
Asina e  contamento di storia ta haya un ambiente familiar intimo. E actividadnan di e fase di termino largo ta enfoca riba e mucha te cu 12 pa 13 aña.
   
Proyecto Piloto
Na mei 2008 a cuminsa cu e bishitanan na cas den forma di un proyecto piloto. Den e prome periodo aki un grupo di 18 lesado a scoge 144 cas di famia pa lesa of conta storia pa e mucha prome cu e bay drumi.
E reaccion di tanto e muchanan como e mayornan tabata tremendo. E demanda pa bishita na cas di parti di e famianan tawata asina grandi, cu BNDD no por a cumpli cu esaki den un periodo so.

Cooperacion cu Biblioteca Nacional Aruba (BNA)
Un proyecto di promocion di lesamento no por funciona sin cooperacion di biblioteca. Di momento cu a presenta directora di Biblioteca Nacional Aruba, Sra. Astrid Britten, e proyecto el a duna su sosten completo na esaki.

Persona di contacto cu a traha di cerca cu ne for di un principio ta Sra. Belkis Flores, cu ta na cabes di Departamento di Mediateca Escolar di BNA. Den consulta cu BNA, nos a conclui cu pa logra e meta, un periodo pa aña no ta suficiente. Nos a realisa cu e necesidad, di por lo menos un di dos periodo den un aña, tabata grandi.

Cantidad di famia cu a alcansa
Door di a variedad y diversividad di e actividadnan ta dificil pa bisa exactamente cuanto famia a alcansa. Pa loke ta e bishitanan na cas nos por papia di un cantidad di 3000 famia. Pa calcula e alcanse di e otro actividadnan lo mester sigur triplifica e cantidad aki.

Tayer
Tayernan ta elementonan importante di e proyecto y ta wordo organisa den diferente fase. Primeramente FBNDD ta organisa tayernan pa prepara e boluntarionan pa e tarea nan dilanti.

Seguidamente, despues di cada periodo di bishita na cas, ta tene un sesion di evaluacion pa haya feedback. Durante e tayernan di preparacion ta ofrece e boluntario un codigo di comportacion, pa e compronde e necesidad pa e ta confiabel y pa e actua debidamente. FBNDD no ta organisa tayer solamente pa e boluntarionan, pero tambe pa e directiva, pa motibo cu e fundacion ta evalua su trabou constantemente, teniendo na bista su vision y mision

Evento di clausura
Na final di cada aña di actividad di promocion di lesamento, FBNDD ta organisa un evento grandi di clausura.
E fundacion ta invita tur mucha y ta curasha nan pa bisti nan piyama y bin cu henter famia pa gosa di e actvidad festivo. Durante e evento di clausura FBNDD ta organisa varios actividad manera; contamento di storia, pintamento di cara y dramatisacion, tur esaki pa ilustra e importancia di conta storia y lesa.

Fase di termino largo

E lista di actividad diseña pa e fase aki ta amplio. Nos lo menciona nan den secuencia di nan planificacion, cu a cana paralelo cu nan ehecucion. Mas leu den e website por gosa di e contenido y desaroyo di e actividadnan aki:

  • Clausura grandi na final di cada aña
  • Bustour cu diferente tema.
  • Bibliobus den bario cu cooperacion di BNA
  • Exposicion
  • Informacion den bario
  • Competencia di lesamento
  • Quiz di lesamento
  • Feria di cuenta y storia
  • Lesamento na fiesta di mucha y diferente instancia
  • Duna tayer y informacion na diferente instancia (Instituto Pedagogico Arubano)

FBNDD Partnernan

Fundacion Bon Nochi Drumi Dushi tin e honor di traha cu diferente partner, entre otro:

  • Biblioteca Nacional Aruba
  • Cede-Aruba y Samenwerkende Fondsen  
  • UNOCA
  • Prins Bernhard Fonds
  • Stichting Kultura Mondriaan Fonds
  • Gobierno di Aruba

Reconocemento

Na 2009 FBNDD a ricibi e premio ACURIL; di Caribbean Society of Librarians
Na 2010 FBNDD a ricibi e ‘Prins e Bernhard Kultuur Prijs’ pa promocion di lesamento
Na 2011 FBNDD a ricibi ‘Premio Chuchubi’ di Fundacion Lanta Papiamento
Na 2012 FBNDD a ricibi e ‘Oorkonde Oranje Appels’ di Hulanda
In 2013 FBNDD a wordo nomina pa e ‘Premio Teatro’ di ‘Grupo Teatro Arubano

 
TUMA CONTACTO CU NOS:
Please enter your full name
Please enter your email address
Please enter valid email
Please enter your MENSAHE
Submit
Si, mi kier ricibi noticia BNDD.